कीर्तिपुर, १० भाद्र
त्रिवि पाठ्यक्रम विकास केन्द्रका कार्यकारी निर्देशक प्रा.डा. पारसनाथ यादवको एक कार्यक्रमका बीच बिदाई गरिएको छ । वि.सं. २०७४ भाद्र १० गतेदेखि पहिलो पटक कार्यकारी निर्देशक पदमा नियुक्त हुनु भएका यादवको दुई कार्यकाल पुरा भई उहाँलाई बिदाई गरिएको हो । उहाँको चार वर्षे कार्यकाल वि.सं. २०७८ भाद्र १० गते दोस्रोपटक थप भएको थियो । 
विदाई कार्यक्रममा शिक्षाध्यक्ष प्रा.डा. खड्ग केसीले समकक्षता निर्धारण प्रक्रियामा कार्यकारी निर्देशकको भुमिकामा यादवले उल्लेखनीय योगदान गर्नुभएको बताउनु भयो । उहाँले विश्वविद्यालयको गरिमा बढाउन र प्राज्ञिक इमान्दारिताको कसीमा कार्यकारी निर्देशकको रुपमा यादवले गर्नुभएको योगदानको प्रशंसा गर्नुहुँदै धन्यवाद दिनुभएको थियो । आफ्नो कार्यकालको अनुभव बताउनुहँदै कार्यकारी निर्देशक यादवले आफुले काम गर्दा सधैं कानूनको सर्वोच्चतालाई सर्वोपरी मानेर कार्य गरेको र विधि बनाएर समकक्षता प्रदान गर्ने कार्यको शुरुवात आफुले गरेको बताउनु भयो । आफुले अबका दिनमा त्रिवि सेवामा नै रहेर अध्ययन अनुसन्धान कार्यलाई नै निरन्तरता दिने पनि उहाँले जानकारी गराउनु भयो । 
कार्यक्रममा पाठ्यक्रम विकास केन्द्रको तर्फबाट शिक्षाध्यक्ष प्रा.डा. केसीले मायाको चिनो प्रदान गरी कार्यकारी निर्देशक यादवलाई सम्मान गर्नुभएको थियो । उक्त विदाई कार्यक्रममा त्रिविका अध्ययन संस्थान र संकायका डीनज्यूहरु, प्राध्यापक एवम् कर्मचारीहरुले कार्यकारी निर्देशकको भुमिका सफलतापुर्वक निर्वाह गरी कार्यकाल पुरा गर्नुभएकोमा बधाई एवम् धन्यवाद ज्ञापन गर्नुभएको थियो । कार्यक्रमको सञ्चालन स्तर निर्धारण शाखा प्रमुख सुशील दाहालले गर्नुभएको थियो ।